Sua Eselénsia Ministru Petróleu no Rekursus Minerais, Francisco da Costa Monteiro ho lideransa husi instituisaun tutela sira, Segunda-Feira ne’e, aprezenta proposta Orsamentu Jerál Estadu 2024 ba Komité Revizaun Orsamentu ne’ebé lidera husi Sua Eselénsia Primeiru Ministru, Kay Rala Xanana Gusmão.
Durante aprezentasaun, Ministériu Petróleu no Rekursus Minerais ho instituisaun tutela sira la husu proposta ba orsamentu adisionál no Sua Eselénsia Ministru Francisco Monteiro hateten, valór husi dotasaun ba tinan 2024, sei anunsia durante prosesu dikusaun iha Parlamentu Nasionál.
“Ne’e prosesu diskusaun, montante ne’e hein lai, tanba depois Komité Revizaun Orsamentu tetu hotu, hare nia méritu ba programa ida-ida, sei lori ba Konsellu Ministru aprova no sei lori ba Parlamentu Nasional, iha diskusaun iha Parlamentu mak sei ko’alia sai valór husi proposta lolos husi governu nian hira” Tenik Sua Eselénsia Ministru.
Governu Konstitusionál da-sai nia programa prioritáriu ba seitór petróleu no minerais mak negosiasaun dada kadoras Greater Sunrise mai Timor-Leste, diversfika indústria petrolífera Timor-Leste liu-hosi implementasaun Projetu Tasi-Mane no investe iha formasaun rekursus humanus iha área petróleu.
Programa husi Ministériu Petróleu no Rekursus Minerais reflete ba Objetivu Dezenvolvimentu Sustentável – ODS ho objetivu, atu promove kresimentu ekonómiku inkluzivu no sustentável, empregu plenu, produtivu no dignu ba ema hotu.
